Thursday , 18 April 2019
News update
Home >> Article

Article

नायिका करिश्मा मानन्धर एसईईमा सहभागी (भिडियोमा)

काठमाडाैं । 

आजबाट सुरू भएकाे माध्यमिक शिक्षा परीक्षा (एसईई)मा नायिका करिश्मा मानन्धर पनि सहभागी भएकी छन् । उनी विजय स्मारक मावि डिल्लीबजार केन्द्रबाट परीक्षामा सहभागी भएकी हुन् ।

परीक्षा दिनका लागि मानन्धर आफैं बा९च ४२६ नम्बरको कार चलाएरर परीक्षा केन्द्र पुगेकी थिइन् । ४५ वर्षीया मानन्धरले कक्षा ८ देखि काठमाडौं मैतीदेवीस्थित त्रिवेणी माविको नियमित विद्यार्थी भएर पढेकी हुन्।

परीक्षा केन्द्रतर्फ प्रवेश गर्नुअघि करिष्मालाई कोरियोग्राफर गोविन्द राईले टीका लगाएर शुभकामना दिएका थिए । नयाँ शक्ति पार्टीकी नेत्री समेत रहेकी करिष्मालाई नयाँ शक्ति पार्टीका संयोजक बाबुराम भट्टराईले पनि फोन गरेका शुभकामना दिएका छन् ।

उनले एसईई राम्राे तयारी गरेकाे बताउँदै आएकी छिन् । फागू पूर्णिमामा होली पनि नखेली उनले एसईई परीक्षाको तयारी गरेको थिइन् । यस वर्षको एसईई परीक्षामा देशभरबाट ४ लाख ७५ हजार परीक्षार्थी सहभागी भएका छन् । तीमध्ये दुई लाख ३६ हजार ४ सय ४५ छात्र र २ लाख ३८ हजार ५ सय ५८ छात्रा छन् ।

सर्वाधिक चर्चामा रहेका नेपाली चलचित्र क्षेत्रका नायकहरु

नेपाली चलचित्र उद्योगमा एक समय थियो जब भुवन केसी र शिव श्रेष्ठको अनुहारले सिनेमा चल्थ्यो । त्यसपछि सरोज खनाल नेपाली सिनेमामा जम्दै गर्दा अमेरिका गए । त्यति नै बेला राजेश हमालले युगदेखि युगसम्म सिनेमाबाट नेपाली सिनेमामा पाइला चाले ।हमाल नेपाली सिनेमा उद्योगमा भित्रिएपछि झण्डै २ दशक एक्लो राज गरे । त्यो समय यस्तो थियो, चलचित्रको पोस्टरमा हमालको तस्बिर देख्नेबित्तिकै चलचित्र चल्थ्यो ।

हमाल निमार्ताहरुका लागि लगानी बचाउने हिरो त बने तर सबै चलचित्रमा एउटै अभिनयले हमाललाई चलचित्र उद्योगमा अलि कमजोर बनायो । यसैबीचमा श्रीकृष्ण श्रेष्ठ, धिरेन शाक्य, दिलिप रायमाझी, रमेश उप्रेती, निखिल उप्रेती, विराज भट्ट, रमित ढुंगाना लगायतका अभिनेताहरुले पनि प्रवेश गरे ।कोही नृत्यमा चम्किए, कोही एक्सनमा रमाए र कोही ‘लभर ब्वाय’का रुपमा चर्चित भए । तर समयको मागलाई कसैले पनि बुझ्न सकेनन् ।देशमा हुने राजनैतिक परिवर्तन जस्तै भयो सिनेमा उद्योगमा पनि ।

प्रधानमन्त्रीको कुर्सीमा पात्र फेरिएजस्तै दशर्कको मनमा सिनेमाका हिरो पनि फेरिन थाले । एकताका दयाहाङ राई अभिनित चलचित्रले राम्रो बजार लिन थाल्यो । उनको आगमनसँगै पहिलेको तुलनामा केही फरक धारका सिनेमाहरु बन्न थाले । पछिल्लो समय पनि दयाहाङकोसिनेमामा अभिनय पातलिँदै गएको देखिन्छ ।

पुराना अभिनेताहरुलाई समयसँगै हराउँदै जाँदा नयाँ अभिनेताहरुक जन्मिरहेका छन् । अहिले अनमोल केसी, प्रदिप खड्का, पल शाह, सलिनमान बानिया, आकाश श्रेष्ठ, आशिरमान देशराज जोशी लगायतका अभिनेताहरु उदाएका छन् ।पछिल्लो समय चलचित्र क्षेत्रमा उनीहरुकै बाहुल्य देखिन्छ । अनमोल केसीलाई लिएर चलचित्र निर्माण गर्न सके सफल भइन्छ भन्ने धेरै निर्देशक निर्माताहरुको बुझाइ छ ।

अनमोलले यो कुरालाई प्रमाणित पनि गरिसकेका छन् । उनले काम गरेको सबै चलचित्रले राम्रो व्यापार गरेको छ । अनमोलको फ्यान फलोइङ पनि निकै राम्रो छ । उनी एउटा चलचित्रमा अभिनय गरेको ५० लाख रुपैयाँ लिने गर्छन् । अनमोल केसी अभिनित दुई चलचित्र क्याप्टेन र ए मेरो हजुर ३  प्रदर्शनमा आउने तयारीमा छन् ।

उनकाे दिवाकर भट्टराई निर्देशित चलचित्र क्याप्टेन फागुन १७ गते र झरना थापा दिर्नेशित चलचित्र ए मेरो हजुर ३ चैत्र २९ गते रिलिज हुँदैछन् । अभिनेता अनमोल केसीले केही सयम अघि मिलन चाम्सले निर्देशन गर्ने भनिएको चलचित्र ‘ब्याच्लर बन्टी’को कथा मन नपरेको भन्दै छाडेका थिए ।

अभिनेता अनमोल केसीजस्तै चर्चा बटुलेका अर्का अभिनेता हुन् प्रदिप खड्का । उनलाई चलचित्र प्रेमगीतले दर्शकमाझ चिनायो । चलचित्र प्रेमगीतमा नायकका लागि शुरुमा अनमोल केसीलाई भनिएको थियो तर अनमोलले काम गर्न मानेनन् । अवसर प्रदिप खड्काले पाए ।

त्यही चलचित्रले उनलाई स्टार बनायो । अहिले पनि अनमोलले काम गर्न नमानेको चलचित्रको अफर प्रदिपलाई जाने गरेको पाइन्छ । अनमोलले गर्न नमानेको चलचित्र ब्याबच्लर बन्टी पनि अभिनेता प्रदिप खड्कालाई अफर गरिएको छ । तर प्रदिपले यस चलचित्रमा काम गर्ने नगर्नेबारे केही पनि  खुलाएका छैनन् ।

प्रदिप खड्का अभिनित केही चलचित्रलाई दर्शकले रुचाएका छन् भने केही चलचित्रले सामान्य व्यापारमै चित्त बुझाउनुपरेको छ । पछिल्लो समय प्रदिप खड्कालाई उदार भावना भएका अभिनेताका रुपमा समेत व्याख्या गर्न थालिएको छ ।

प्रदिपले उनकै प्रतिष्पर्धी मानिने अभिनेता अनमोल केसीको चलचित्र क्याप्टेनको ट्रेलर शेयर गरेर अनमोल र आफू दाजुभाइ भएको प्रतिक्रिया दिएका थिए । त्यसपछि नेपाली चलचित्र उद्योगमा उनीप्रति हेर्ने दृष्टिकोण नै परिवर्तन भएको मानिन्छ ।

उनलाई धेरैले रियल हिरोको नाम पनि दिएका छन् । प्रदिप खड्का अभिनित चलचित्र लभस्टेशनलाई पनि प्रतिक्षित चलचित्रका रुपमा हेरिएको छ । चलचित्र लभ स्टेशन आउँदो चैत्र २२ गतेबाट नेपारभर प्रदर्शनमा आउने पक्का भएको छ ।

अभिनेता पल शाह पनि पछिल्लो समय चर्चामा रहने अभिनेतामध्येका एक हुन् । उनलाई म्युजिक भिडियोमा निकै रुचाइएको थियो । उनले विकासराज आचार्यको चलचित्र नाई नभन्नु ल ४ बाट चलचित्रमा डेब्यु गरेका हुन् । त्यसपछि उनले जोनी जेन्टलमेन, म यस्तो गीत गाउँछुु, शत्रु गते लगायतका चलचित्रमा काम गरिसकेका छन् ।

उनी यतिबेला मिलन चाम्सद्धारा निर्देशित चलचित्र वीर विक्रम २ को छायांकनमा व्यस्त छन् । यस चलचित्रका लागि अभिनेता आकाश श्रेष्ठलाई छनोट गरिएको थियो । तर छायांनक सुरु हुनेबेला आकाशका हजुरबुवा विरामी भएपछि उनले चलचित्र छाडे र यो अवसर पल शाहलाई मिल्यो ।

चलचित्र क्षेत्रमा अभिनेता पल र अभिनेत्री आँचललाई वास्तविक जोडीका रुपमा हेर्ने गरिएको छ । केही अगाडि अभिनेत्री आँचल शर्मालाई पत्रकारसँग माफी माग्न लगाइएको कुरामा असन्तुष्टि जनाउँदै स्टाटसमा आक्रोस पोखेका कारण अभिनेता चर्चामा आएका थिए । यस विषयलाई लिएर नेपाली चलचित्र क्षेत्रमा बहस पनि भएको थियो ।

यस्तै चर्चामा रहने अर्का नायक हुन् सलिनमान बानियाँ । उनले झरना थापाको चलचित्र ए मेरो हजुर २ बाट नेपाली चलचित्र क्षेत्रमा डेब्यु गरेका हुन् । सलिनमान उनको लुक्स तथा गेटअपका कारण निकै चर्चामा रहेने गरेका छन् ।

सलिनमान अभिनित चलचित्र यात्रा र अनमोल केसी अभिनित चलचित्र ए मेरो हजुर ३ एकै दिन प्रदर्शनमा आउने भएकोले पनि उनको चर्चा बढेको छ ।ए मेरो हजुर २ मा काम गरेकै समयमा उनी धेरै निर्माता तथा निर्देशकको आँखामा परिसकेका थिए । नयाँ चलचित्रको लागि अफर आउने गरे पनि कथा चित्त बुझेपछि मात्र काम गर्न राजी हुने गरेको उनले बताएका छन् । सलिनमान मिडियामा आइरहन नचाहने अभिनेताका रुपमा चिनिन्छन् ।

अभिनेता आकाश श्रेष्ठ पनि निकै फ्यान फलोइङ भएका अभिनेताका रुपमा चिनिन्छन् । उनलाई चलचित्र राम कहानीमा दर्शकले निकै रुचाए । राम कहानीमा नायिका पूजा शर्माको जोडी भएर काम गरेका आकाशको नाम पूजासँग जोडियो । दर्शकले पनि आकाश र पूजालाई असल जोडीका रुपमा हेरे ।

आकाश फेरि पनि पूजा शर्मा र सुदर्शन थापासँगै काम गरिरहेका छन् । सुदर्शन थापाले निर्देशन गर्न लागेको चलचित्र ‘सम्हालिन्छ कहिले मन’मा आकाश र पूजालाई देख्न पाइने छ ।तर, उनीहरु जोडीकै रुपमा प्रस्तुत हुँदैछन् या छैनन् भन्ने कुरा भने सार्वजनिक भएको छैन ।  चलचित्रको यतिबेला धमाधम छायांकन भइरहेको छ ।

मनोज दाहाल -उज्जालो अनलाईन

‘मारुनी’मा भरे दिपकले संगीत


गायक दिपक बज्रचार्यले पहिलो पटक नेपाली चलचित्रमा संगीत दिएका छन् । पछिल्लो समय ‘मन मगन’ बोलको गीतका कारण चर्चामा रहेका गायक बज्रचार्यको संगीत र स्वरमा समावेश चलचित्र ‘मारुनी’को ‘जाम्न माया जाम’ बोलको गीतको रेकडिङ काठमाण्डौको कृपा डिजिटल स्टूडियोमा गरिएको हो ।

पूनम इन्टरटेन्मेन्टको ब्यानरमा निर्माण भएको यो चलचित्रमा ३ वटा गीत समावेश छ । जसमा ‘जाम्न माया जाम’ बोलको केही फरक गीत दिपक बज्रचार्यले तयार पारेका हुन् । उनले, यसपटक निर्मात्री पूनम गौतमले आफूले भने अनुसार नै काम गर्ने वातावरण बनाएको कारण चलचित्रमा संगीत र स्वर दिएको स्पष्ट पारे । ‘मैले धेरै पहिले चलचित्रको गीतमा आवाज भरेको थिएँ । तर, चलचित्रमा काम गर्न पर्याप्त समय नपाइने, निर्माताले भने अनुसार गीत बनाउनुपर्ने भएपछि मैले यततार्फ रुची देखाइनँ’- दिपकले भने ।

यस्तै, निर्मात्री पूनम गौतमले भनिन्–‘मैले दिपक बज्रचार्यजीले भनेकै जती समय दिएको थिएँ । उहाँले ६ महिना माग्नुभयो, मैले ६ महिनामा भनेजस्तो गीत चाहिन्छ भनेपछि उहाँ काम गर्न तयार हुनुभएको हो । अहिले फाइनल गीत सुन्दा खुशी लागेको छ ।’

गायक बज्रचार्यले सामान्य शब्दमा गीत तयार गर्दा दर्शकको मुखमा झुन्डिन्छ भन्ने आफूले वुझेको बताए । यो गीतमा रिक्की शाक्यको शब्द, फिरोज बज्रचार्यको मिक्सिङ र मोहित मुनालको एरेन्जमेन्ट रहेको छ । यो गीतको भिडियोमा चलचित्रका मुख्य कलाकार पुष्पल खड्का र साम्राज्ञी राज्यलक्ष्मी शाहलाई फिचरिङ गरिने निर्मात्री गौतमले बताइन् ।

फागूणको १८ गतेबाट छायांकन सुरु गर्न लागिएको चलचित्रलाई आउँदो बर्षको भदौ १३ गते रिलिज गर्ने पक्का गरिएको छ । यो चलचित्रलाई नवल नेपालले निर्देशन गर्न लागेका हुन् ।

“ग्रीन बूक” ले जित्यो ओस्कार अवार्ड

नागरिक अधिकारको पक्षमा लेखिएको विवादास्पद हलिउड चलचित्र “ग्रीन बूक” ले यस वर्षको ओस्कार स्वर्णपदक जितेको छ । यस चलचित्रमा सन् १९६० को दशकमा संयुक्तराज्य अमेरिकाको दक्षिण क्षेत्रमा बसोबास गर्ने एकजना गोरा ड्राइभर र काला जातिका पियानो बादकबीचको प्रेममय सम्बन्धलाई कथावस्तुमा समेटिएको छ ।

अमेरिकाको लस एन्जलसमा सोमबार बिहान भएको ९१ औँ संस्करणको ओस्कार अवार्ड ग्रीन बुकले उत्कृष्ट चलचित्रको अवार्ड जितेको हो । अभिनेता रामी मालेकले यस पटकको ओस्कार अवार्डमा बेस्ट एक्टरको अवार्ड हात पारेका छन् ।

उत्कृष्ट अभिनेताकाे अवार्ड लिँदै रामी मालेकउत्कृष्ट अभिनेताकाे अवार्ड लिँदै रामी मालेक

चलचित्र ‘बोहेमियन राप्सोडी’ मा फ्रेडी मर्करीको भूमिकाका लागि मालेकले ९१औँ संस्करणको एकेडेमी अवार्डमा उत्कृष्ट अभिनेताको अवार्ड हात पारेका हुन् ।

मालेकले ‘भाइस’ मा पूर्व अमेरिकी राष्ट्रपति डिक चेनीको भूमिकामा देखिएका क्रिस्टियन बेल र ‘अ स्टार इज बर्न’ मा ज्याक मेनको भूमिकाका देखिएका ब्राड्ले कूपरलाई पछि पार्दै उत्कृष्ट अभिनेताको अवार्ड जितेका हुन् ।

ग्रीन बुक चलचित्रका लागि ओस्कर पुरस्कार लिँदै निर्देशक पीटर फेरेली ग्रीन बुक चलचित्रका लागि ओस्कर पुरस्कार लिँदै निर्देशक पीटर फेरेली

‘बोहेमियन राप्सोडी’ ब्रिटिस रकब्यान्ड ‘क्वीन’ का लिड सिंगर फ्रेडी मर्करीको जीवनमा आधारित चलचित्र हो । फ्रेडी मर्करीको सन् १९९१ मा एड्ससँग सम्बन्धित रोगका कारण निधन भएको थियो ।

उत्कृष्ट निर्देशककाे ओस्कर पुरस्कार लिँदै अल्फान्साे क्युराेनउत्कृष्ट निर्देशककाे ओस्कर पुरस्कार लिँदै अल्फान्साे क्युराेन

बोहेमियन राप्सोडीका अलावा रामी मालेक टेलिभिजन शृंखला ‘मिस्टर रोबोट’ का कारण पनि चर्चित छन् । त्यस्तै ‘रोमा’ ले सर्वोत्कृष्ट विदेशी भाषाको फिल्म तथा सर्वोत्कृष्ट सिनेमाटोग्राफीको अवार्ड जितेको छ ।

अल्फान्सो क्वारोनको लेखन र निर्देशन रहेको मेक्सिकन भाषाको यो श्यामश्वेत चलचित्रमा सन् १९७० को दशकको मध्यम वर्गीय गृहिणीको कथा समेटिएको छ ।

उत्कृष्ट अभिनेतृकाे ओस्कर पुरस्कार लिँदै ओलिभिया काेलम्यान उत्कृष्ट अभिनेतृकाे ओस्कर पुरस्कार लिँदै ओलिभिया काेलम्यान

बेलायती अभिनेत्री ओलिभिया कोलमेनले ‘द फेभरेट’ का लागि सर्वोत्कृष्ट अभिनेत्रीको अवार्ड हात पारिन् ।

उत्कृष्ट ओरिजिनल गीतका पुरस्कार लिँदै गायिका लेडी गागा उत्कृष्ट ओरिजिनल गीतका पुरस्कार लिँदै गायिका लेडी गागा

कसले के जिते ?

उत्कृष्ट चलचित्र : ग्रीन बुक
उत्कृष्ट निर्देशक : अलफान्सो क्यूरोन (रोमा)
उत्कृष्ट अभिनेत्री : रामी मालेक
उत्कृष्ट अभिनेता : ओलिभिया कोलम्यान
उत्कृष्ट सहअभिनेत्री : रेजिना किंग
उत्कृष्ट सहअभिनेता : माहेरशला अली
उत्कृष्ट सिनेमेटोग्राफी : रोमा, अल्फान्सो क्युरोन
उत्कृष्ट एनिमेटेड फिचर फिल्म : स्पाइडर म्यान
उत्कृष्ट ओरिजिनल स्क्रिनप्ले : ग्रीन बुक
उत्कृष्ट एडेप्टेड स्क्रिनप्ले : ब्ल्याकक्लान्सम्यान
उत्कृष्ट ओरिजनल स्कोर : ब्ल्याक प्यान्थर
उत्कृष्ट डकुमेन्ट्री फिचर : फ्री सोलो
उत्कृष्ट शर्ट डकुमेन्ट्री : पिरियड एण्ड अफ सेन्टेन्स
उत्कृष्ट लाइव एक्सन सर्ट : स्किन
उत्कृष्ट एनिमेटेड सर्ट : बाओ
उत्कृष्ट प्रोडक्सन डिजाइन : ब्ल्याक प्यान्थर
उत्कृष्ट कस्ट्युम डिजाइन : ब्ल्याक प्यान्थर
उत्कृष्ट हेयर एण्ड मेकअप : वाइस
उत्कृष्ट साउण्ड एडिटिङ : बोहेमियन राप्सोडी
उत्कृष्ट साउण्ड मिक्सिङ : बोहेमियन राप्सोडी
उत्कृष्ट भिजुअल इफेक्ट : फर्स्ट म्यान
उत्कृष्ट सम्पादन : बोहेमियन राप्सोडी
उत्कृष्ट ओरिजनल सङ : श्यालो

‘क्याप्टेन’ प्रचारप्रसार गर्न अनमोल र भुवन चितवनमा (फोटोफिचर)

 

फाल्गुन १७ गतेबाट प्रदर्शनमा आउन लागेको चलचित्र ‘क्याप्टेन’ प्रचारप्रसारको लागी चितवन आएको छ । अभिनेता तथा निर्माता भुवन केसीले चलचित्रले राष्ट्रिय फुटबल टिमको कथा बोकेकोले ‘क्याप्टेन’ राष्ट्रले गौरव गर्न लागेको चलचित्र रहेको वताए ।

चलचित्रको प्रचार प्रसारको लागि चितवन आईपुगेका केसीले आज ईन्द्रदेव सिनेमा हलमा आयोजित पत्रकार सम्मेलनमा चलचित्रले राष्ट्रिय भाव झल्काउने बताएका हुन् । यस्तै केसीले चलचित्र अन्य कुनै निर्माता अथवा ब्यानरले निर्माण गरेको भए लगानी ८ करोड हाराहारीमा पुग्ने उनले बताए ।

‘अन्य ब्यानर अथवा कुनै अरु निर्माताले निर्माण गरेको भए लगानी ८ करोड पुग्ने थियो तर हामीले २ करोड हाराहारी सम्पन्न गर्यौ । ३५ बर्षे करियरमा धेरै सँग राम्रो सम्बन्ध भएकोले सबैले सहयोग गर्नु भयो । यसर्थ फिल्म २ करोड आसपासमा सकियो – केसीले भने ।’

यस्तै केसीले चलचित्रको ‘कर्ली कर्ली कपाल’ लाई लागेको चोरीको आरोप बारे पनि मुख खोलेका छन् । पत्रकारहरुले चोरी आरोप बारे राखेको प्रश्नको जवाफ दिदै उनले संयोगबस एक बलिउड फिल्मको गीत सँग यसको कोरियोग्राफी मिल्न गएक बताएका छन् । ‘कहिले काही यसरी मेल खान सक्छ, संसारमा फिल्म बन्ने भनेको रोमान्स र एक्सनको कथामा हो, यसर्थ कहिले काही मेल खान सक्छ यसलाई चोरी नै भन्न मिल्दैन – उनले भने ।’

केसीले चलचित्रमा नेपाली राष्ट्रिय फुटबल टिमको खेलाडीहरुको समेत अभिनय रहेको बताए । यस्तै उनले निर्देशक दिवाकर भट्टराईले निर्देशकिय पाटोमा न्याय गरेको पनि बताए । राष्ट्रिय टिमबाट आफ्नो देशको प्रतिनिधित्व गर्दै खेल्न चाहने एक खेलाडीले के कस्तो संघर्ष गर्नु पर्छ भन्ने कथा नै ‘क्याप्टेन’ भएको निर्माता केसीले बताएका छन् ।

चलचित्रमा नायक अनमोल केसीले ‘क्याप्टेन’ का लागि आफुले निकै मेहनत गरेको बताएका छन् । उनले आफुलाई एउटा फुटबल खेलाडीको रुपमा प्रस्तुत गर्नका लागि ४ महिना बिहान बेलुका नै फुटबलको प्रशिक्षण लिएको बताएका छन् । अनमोलले चलचित्रका लागि राष्ट्रिय टोलीका पुर्व कप्तान, वर्तमान राष्ट्रिय टोलीका कप्तान, पुर्व खेलाडी , वर्तमान राष्ट्रिय टोलीका खेलाडी र प्रशिक्षकहरुबाट पनि ठुलो सहयोग मिलेको बताएका छन् ।

एउटा युवकले राष्ट्रिय टिमबाट खेल्दै देशलाई विश्व माझ चिनाउन के कस्तो संघर्ष गर्छ भन्ने कथा ‘क्याप्टेन’ ले बोकेको उनले बताएका छन् । अनमोलले यस अघीका चलचित्रलाई चितवनका दर्शकहरुले अत्याधिक रुचाएकोले यस पटक पनि चितवनबाट धेरै मायाको अपेक्षा रहेको बताएका छन् । ‘क्याप्टेन’ आफ्नो करियरको फरक फिल्म भएकोले एक पटक हेरेर प्रतिकृया दिन समेत उनले सम्पूर्ण दर्शकहरुलाई आग्रह गरेका छन् ।

फागूण १७ गतेबाट रिलिज हुन लागेको यो चलचित्रमा अनमोलको अलावा सुनिल थापा, उपासना सिंह ठकुरी, प्रियंका एमभी, प्रशान्त ताम्राकार, राजाराम पौडेल, विल्सन विक्रम राई मुख्य भूमिकामा छन् । द सुपर काजोल फिल्म्सको ब्यानरमा निर्माण भएको चलचित्रलाई दिवाकर भट्टराइको निर्देशन गरेका हुन् । फिल्ममा निर्देशक दिवाकर भट्टराईसँगै सामिप्यराज तिमल्सेनाको कथा, सुदीप बरालको डिओपी, नवराज उप्रेतीको छायांकन, अर्जुन पोखरेलको संगीत, दिर्घ राज खड्काको सम्पादन, कविराज गहतराजको कोरियोग्राफी रहेको छ । जिया केसु चलचित्रकी कार्यकारी निर्मात्री हुन् ।

चलचित्र ‘अदालत’ को ट्रेलर सार्वजनिक (भिडियो)

फागुन २४ गतेबाट रिलिज हुने चलचित्र ‘अदालत’ को ट्रेलर सार्वजनिक भएको छ । चलचित्रका लेखक तथा निर्देशक दिनेश लिङ्देन रहेका छन् । फाल्गुनन्द लिङ्देन फिल्मस्द्वारा निर्माण गरिएको चलचित्रमा एलिना बास्कोटा, राजकुमार अधिकारी, मदन भुजेल, रुद्र पाहिम लिम्बु, शान्ति लामा, मेखबहादुर मगर, उदय सुब्बा, प्रेम आले, दिपक क्षेत्री, राजु घिमिरे, दिलिप ठकुरी, पुन्य ओझा, अजय खडकाआदिको मुख्य भुमिका रहेको छ ।

मदन, राजकुमार, रुद्र र शान्तिले यसै फिल्मबाट डेब्यु गरेका हुन् । चलचित्रमा डा डा. डिजन भट्टराईको गीत, रोशन बान्तवा राईको संगीत, दिनेश माङमुको नृत्य, राजु किराँतीको द्वन्द्व, विक्रम डिसिको छायांकन छ । बसन्त थेवे कार्यकारी निर्माता, मेखबहादुर मगर सह–निर्माता र आरपी दाहाल प्रस्तुतकर्ता रहेका छन् ।

‘दि म्यान फ्रम काठमाडौं’ मा कर्मासंग आनाको किचकिच

प्रर्दशनको मिति कुरेर बसेर चलचित्र ‘दि म्यान फ्रम काठमाडौं’को नयाँ गीत सार्वजनिक गरिएको छ । सुजेन्द्र डि कार्कीको शब्द तथा संगीत रहेको गीतमा चन्दन ध्वोज केसीको स्वर छ । चलचित्रको सार्वजनिक गीतमा मुख्य कलाकार कर्मा शाक्य र आना शर्मालाई फिचर्ड गरिएको छ । यो गीतलाई राजन इशानले एरेञ्ज गरेका हुन् ।

स्वर्णीम राईको कस्टुम डिजाइन रहेको गीतको भिडियोलाई निर्देशक तथा चर्चित कोरियोग्राफर रेनेशा वान्तवा राईले निर्देशन गरेकी हुन् । निर्देशक पेमासँगै नकिम उद्धिनको निर्माण बनेको सिनेमामा जोसे मानुइल र अभिनेत्री आना शमार्, चर्चित भारतिय कलाकार गुल्सन ग्रोबर पाकिस्तानी कलाकार हमिद शेखसँगै नेपाली कलाकार नीर शाह, कर्मा शाक्य, मिथिला शर्मा, शिशिर बाङ्देल, सुनिता ठाकुर, परमिता आर एल राना अभिनयमा छन् ।

‘दि म्यान फ्रम काठमाडौं’लाई कार्लोस मेडिनाले खिचेका हुन् । नेपालसँगै हलिउड, बलिउड र पाकिस्तानी कलाकारको समिश्रण रहेको सिनेमालाई पेमा धोन्डुपले निर्देशन गरेका हुन् । योसँगै ‘दि म्यान फ्रम काठमाडौं’को नयाँ एक्सन ट्रेलर पनि सार्वजनिक गरिएको थियो । सिनेमाको यसअघि सार्वजनिक ट्रेलरले दर्शक तथा सिनेमाकर्मीबाट राम्रो प्रतिक्रिया पाएको थियो ।

‘पुरानो बुलेट’को ट्रेलर सार्वजनिक (भिडियो)

चैत्र १ गतेबाट प्रदर्शनको तयारीमा रहेको  ‘पुरानो बुलेट’को ट्रेलर सार्वजनिक गरिएको छ ।  सिनेमाको सार्वजनिक ट्रेलरमा माया, प्रेम र विछोडलाई फोकस गरिएको छ । निर्माण टिमका अनुसार सिनेमाको कथा अनुप, वर्षा र मालाको बरिपरि घुमेको छ ।

’पुरानो बुलेट’को यहि फेब्रुअरी २३ तारिखमा हङकङमा वर्ल्ड प्रिमियर हुँदैछ । वर्ल्ड प्रिमियरलाई मध्यनजर गर्दै केहीदिन पहिलो पोस्टर सार्वजनिक गरेको निर्माण टिमले आज काठमाडौंमा एक कार्यक्रमको आयोजना गरि सिनेमाको ट्रेलर सार्वजनिक गरेको हो । सिनेमामा अनुप, बर्षा र मालाका अलवा कविता आले, कृष्णभक्त महर्जन, शिरोमणी दवाडी, शिव मुखिया, दिवज राई लगायत लिड अभिनयमा छन् । बादल श्रेष्ठ, करण धिताल, युडी गुप्ता लगायतको अभिनय पनि ‘पुरानो बुलेट’ मा समावेश छ ।

सिनेमाको कथा, पटकथा तथा संवाद लेखनमा निर्देशक भीषणले सन्तोष राईसँग सहकार्य गरेका छन् । सन्तोष राई सिनेमाका कार्यकारी निर्माता पनि हुन् । ‘पुरानो बुलेट’मा अशोककुमार राई ९साम्पाङ०, दिपेन्द्र लिम्बु, विरेन साम्बा र टिकाराम राईले मिलेर निर्माण गरेका हुन् । सिनेमामा उत्तमजङ्ग लिम्बु, जयन जे वाइवा र भिजे घिमिरेको संगीत, हरि घले लामाको छायाँकन, प्रविण सिंह र प्रशान्त तामाङको कोरियोग्राफी, अर्जुन जिसीको सम्पादन रहेका छ ।

प्रेम दिवशमा सार्वजनिक भयो केकी र बिकास को रोमान्स

   

प्रेम जोडीलाई लक्षित गर्दै नयाँ म्युजिक भिडियो धेरै माया बजारमा आएको छ । भिडियोमा केकी अधिकारी र बिकास लामिछाने गहिरो प्रेम सम्वन्धमा फिचर्ड भिडीयोमा दुईको गहिरो प्रेम देखाईएको छ ।

भिडियोमा हेर्नुस् ।

हेमन्त शिशिरको शब्द संगीत रहेको गीतमा संगीतकार शिशिर र चर्चित गायिका अन्जु पन्तले स्वर दिएका छन । सगरमाथा म्युजिक प्रालिले बजारमा ल्याएको भिडियोलाई समन अधिकारीले निर्देशन गरेका छन् । भिडीयोमा निरोज श्रेष्ठको छायाँकन , अरुणा घिमिरेको मेकअफ र बिकास धमलाको सम्पादन गरेका छन् ।

 

हरेक बर्ष नेपाली फिल्ममा आधा अर्ब डुब्छ

नेपाली फिल्ममा लगानी बढेको छ । बर्सेनि बन्ने फिल्मको संख्या सय हाराहारी पुगेको छ । तर, नाफा ? अहँ, छैन । बरु हरेक वर्ष आधा अर्बभन्दा बढी रुपैयाँ डुबिरहेको छ ।फिल्म निर्माणमा वार्षिक एकदेखि डेढ अर्बको लगानी हुन्छ । तर निर्माण भएका पाँचदेखि सात प्रतिशत चलचित्रले मात्रै लगानी सुरक्षित गर्छन् ।

०७५ सालको आठ महिना अवधिमा प्रदर्शनमा आएका ६५ चलचित्रमध्ये पाँच प्रतिशतले मात्र लगानी जोगाए । तीन प्रतिशतले लगानीको थोरै गुणा नाफा कमाए । नाफा कमाउने केही प्रतिशत फिल्मको ‘चार्म’ देखेर लगानी दिनदिनै बढ्दै गएको छ । अघिल्ला वर्षहरूमा भन्दा पनि यस वर्ष फिल्म फ्लप हुने क्रम अत्यधिक देखियो ।

वैशाख ७ गते रिलिज भएको वर्षको पहिलो फिल्म ‘स्वर्ग मेरो गाउँ’देखि मंसिर २८ गते प्रदर्शनमा आएका ‘सु श्री सम्पत्ति’, ‘डोली’ र ‘कथा ७२’सम्म आइपुग्दा ६५ फिल्म रिलिज भए । तीमध्ये ‘छक्का पन्जा-३’ सर्वाधिक कमाउने फिल्म बन्यो । यसले अहिलेसम्म १७ करोड रुपैयाँभन्दा माथि कलेक्सन गरेको छ भने अहिले पनि केही हलमा प्रदर्शनरत छ ।

‘नाइँ नभन्नु ल-५’, ‘रामकहानी’, ‘इन्टु मिन्टु लन्डनमा’, ‘जय भोले’, ‘चंगा चेट’लगायत केही फिल्मले नाफा कमाए । ‘प्रसाद’ले प्रदर्शनको आकर्षक सुरुआत गरेको छ । यसबीचमा निर्मित प्रायः सबै फिल्मको लगानी एक करोड रुपैयाँ र त्योभन्दा माथि छ । ‘इन्टु मिन्टु’ले त आफ्नो फिल्मको लगानी तीन करोड रुपैयाँभन्दा माथि रहेको जनाएको छ ।

कलाकारको बढ्दो पारि श्रमिक र विदेशमा छायांकन गर्ने होडबाजीका कारण फिल्मको बजेट वृद्धि भएको हो । बजेट बढे पनि फिल्मको बजार विस्तार हुन नसक्दा व्यापारघाटा अत्यधिक देखिएको हो ।

‘नेपाली फिल्म रिलिज गर्नै गाह्रो छ । हलवालाहरू नेपाली फिल्म प्रदर्शन गर्नै मान्दैनन् । झन् मल्टिप्लेक्सहरूले त सो नै दिँदैनन्’, अघिल्लो महिना रिलिज भएको फिल्म ‘गुनगुन’का निर्माता तथा निर्देशक पुकार भट्टराई भन्छन्, ‘मेरो फिल्म चल्दाचल्दै उतारियो । अनि कसरी निर्माता सुरक्षित हुन्छन् ? विदेशी फिल्मलाई रेड कार्पेट ओछ्याइन्छ, नेपाली फिल्म चल्नै दिँदैनन् ।’

निर्माताहरू नेपाली फिल्मको लगानी डुब्नुको अधिकांश दोष हलवालालाई दिन्छन् । तर, वितरक सुनील मानन्धर भन्छन्, ‘फिल्ममा लगानी मात्रै गर्ने तर कन्टेन्टमा ध्यान नदिने प्रवृत्तिले यस्तो अवस्था आएको हो । यहाँ निर्माताले आफ्नो फिल्मले यति कमायो, उति कमायो भनेर गर्ने गरेको चर्चा हल्ला मात्रै हो । स्थिति धेरै नाजुक छ । पाँचसात प्रतिशत फिल्मले मात्रै कमाउँछन्, बाँकी सबै डुब्ने हो ।’

नेपाली फिल्ममा विदेशमा रहेका नेपालीले लगानी गर्न थालेपछि पनि बजेट बढ्दै गएको मानिन्छ । बजारको आकलनै नगरी कलाकारको पारि श्रमिक बढाइन्छ । प्रदीप खड्का, अनमोल केसीलगायत अभिनेता प्रतिफिल्म ३० देखि ५० लाख रुपैयाँसम्म अफर गर्न थालेका छन्, जुन रकम केही वर्षअघिसम्म पूरै फिल्मको बजेट हुन्थ्यो ।

अभिनेत्री साम्राज्ञी नामै तय नभएको एउटा फिल्मका लागि १५ लाख रुपैयाँमा अनुबन्धित भइन् । हाल छायांकनमा रहेको फिल्म ‘पासवर्ड’को एउटा आइटम गीतका लागि बलिउड अभिनेत्री सन्नी लियोनले तीन करोड रुपैयाँ लिइन् । लन्डनमा छायांकन भइरहेको यो फिल्मको बजेट सात करोड रुपैयाँभन्दा माथि हुने बताइएको छ ।

गत वर्ष रिलिज भएका ८३ चलचित्रमध्ये १० प्रतिशतले नाफा कमाएका थिए । तिनमा २० प्रतिशतले लगानी उठाए । बाँकी सबैले आफ्नो फिल्म असफल हुनुको दोष हलवाला, कलाकार, वितरकलगायतलाई लगाउँदै आफैलाई सान्त्वना दिए ।

२०७४ वैशाख १ गते दीपेन्द्र लामा निर्देशित फिल्म ‘घामपानी’ रिलिज भएको थियो । वर्षको अन्तिम दिन चैत ३० गते मिलन चाम्स निर्देशित फिल्म ‘लिलिबिली’ र देवकुमार श्रेष्ठ निर्देशित ‘नेप्टे’ रिलिज भए । यो वर्ष सर्वाधिक कमाउने फिल्ममा ‘छक्कापञ्जा-२’, ‘शत्रुगते’, ‘कृ’, ‘ए मेरो हजुर-२’ लगायत रहे । सिक्वेल फिल्मको क्रम चलिरहेकै बेला आएको ‘छक्कापञ्जा-२’ले बक्स अफिसमा राम्रो कलेक्सन गर्‍यो । छिटो कलेक्सनको हिसाबले यसले अघिल्लो फिल्मलाई उछिन्यो । यो फिल्म एक करोड ५० लाख रुपैयाँमा निर्माण भएको हो ।

यसैगरी धेरै कमाउने अर्को फिल्म बन्यो, मह सञ्चारको ‘शत्रुगते’ । एक करोड ५० लाख रुपैयाँ लागतमा बनेको चलचित्रले रामै्र कमायो । यस्तै भुवन केसी र सुवास गिरीले निर्माण गरेको ‘कृ’मा दुई करोडभन्दा बढी खर्च भएको थियो तर यसले अपेक्षाकृत व्यापार गरेन ।

२०७३ सालभित्र एक सय ६० फिल्म निर्माणका लागि चलचित्र विकास बोर्डमा दर्ता भए पनि २०७४ मा ८३ फिल्म मात्र रिलिज भए । रिलिज भएका धेरै फिल्मले १० देखि ५० प्रतिशत मात्रै लगानी सुरक्षित गर्न सके । औंलामा गन्न सकिने केही फिल्मले लगानीको दुईतीन गुणासम्म नाफा कमाए । स्वदेशी सामान्य बजारले धान्न नसक्ने बजेट र विदेशी बजार उपयोग गर्न नसक्दा धेरै निर्माताको लगानी डुबेको हो ।साभार : अनन्त वाग्ले,अन्नपूर्ण