५० वर्षअघिको त्यो बिटल्स् कन्सर्ट

फाल्गुन ६,मंगलबार
पचास वर्ष भएछ, विश्वमा बिटल्समेनिया फैलिएको। बिटल्सका चार युवा कलाकारले विश्वसंगीतमा नयाँ ऊर्जा भरे। त्यसबेला एटलान्टिक ओसियनको पारितर्फ एल्भिस प्रिल्सेको जादु थियो भने वारि बिटल्सको हलचल। सन् १९६४ को फेब्रुअरी ९ मा बेलायती रक ग्रुप बिटल्सले पहिलो पटक अमेरिकामा लाइभ कन्सर्ट गर्‍यो, जसलाई टेलिभिजनले प्रत्यक्ष प्रशारण गरेको थियो।
लिभरपुलका चार युवाले आफ्नो करिअर सन् १९६० मा जर्मन सहर ह्याम्बर्गबाट सुरु गरेका थिए। उनीहरू अमेरिकामा पनि चिनिन थालेका थिए। ५० वर्षअघि पहिलो पटक अमेरिकामा लाइभ शो गर्दा उनीहरूको ख्याति चुलिइसकेको थियो। न्युयोर्कको त्यो कन्सर्ट कुन हदसम्म चर्चित थियो भने रेडियो प्रसारणले दुई दिनअघि नै समयको सूचना दिँदा भन्ने गर्थे, ‘साँझ साढे ६ बजेको छ- यो हो बिटल्स समय।’
1898967_443976042400560_625468810_nदुई दिनअगावै अर्थात् ७ फेब्रुअरीमा न्युयोर्क पुग्दा सयौं युवती बिटल्सका चार सदस्य जोन लेनन, जर्ज ह्यारिसन, पाउल म्याक कार्टने र रिन्गो स्टर विमानबाट उत्रिने घडीको प्रतीक्षा गरिरहेका थिए। यसरी प्रतीक्षा गर्ने युवतीको संख्या बढ्दै गयो। जसै चार बेलायती तन्नेरी विमानबाट उत्रिए, आफूहरू त्यहाँ चर्चित भइसकेको चाल पाए।
‘हामी राष्ट्रपति जोन अफ केनेडीको हत्याबाट निराश थियौं, आशा जगाउन संगीतमा नयाँ सुरुवात जरुरी थियो’, संगीत इतिहासकार चार्ल्स् रोसने ती पुराना दिन सम्झन्छन्, ‘बिटल्सका चार जवान उत्तम समयमा आए। उनीहरूले हामीलाई हौस्याए।’
बिटल्सको ऐतिहासिक कन्सर्टमा संगीतकार वाल्टर एग्यान पनि सहभागी भए। त्यसबेला उनी १५ वर्षका थिए। ‘एल्भिस र अन्य कलाकार पनि महान थिए। म अहिले पनि रक एन रोल मन पराउँछु। तर १९६४ को त्यो कन्सर्ट भिन्नै थियो। हामी कुनै नयाँपनको लोभमा थियौं’, वाल्टरले भने।
जर्ज ह्यारिसनलाई त्यसबेला ज्वरो आएको थियो। तैपनि चारैजना युवा ९ फेब्रुअरीमा टेलिभिजन शोमा सहभागी भए। त्यो शोलाई सात करोडभन्दा बढी दर्शकले हेरे। भनिन्छ, त्यो रात न्युयोर्कमा अपराध घट्यो, किनकि अपराधी पनि टीभीमा बिटल्सकै शो हेरिरहेका थिए। केही सातापछि बिटल्स अमेरिकी संगीतको हिट सूचीमा पहिलो नम्बरमा पुग्यो। यतिमात्र हैन, दोस्रो, तेस्रो, चौथो, पाँचौं पनि बिटल्स। अर्को कुनै प्रतिस्पर्धी नै अगाडि आउन सकेन।
संगीत इतिहासकार रोसने भन्छन्, ‘यी चार युवाको प्रतिभा गज्जबकै थियो। मेरो उमेर त्यसबेला जम्मा पाँच वर्षको थियो। बेलायती संगीतकारलाई अमेरिकामा त्यसपछि त्यसरी कहिल्यै स्वागत गरिएन।’ ‘रोलिङ स्टोन’ र ‘द हु’ जस्ता ब्यान्ड आए, तर बिटल्सजस्तै लोकप्रिय हुन सकेनन्। रोसनेका अनुसार कसै कसैले त बिटल्सकै गीत सुन्न पनि अंग्रेजी सिके। ‘हरेक मानिस बिटल्स गुनगुनाउन पाएपछि खुसी हुन्थ्यो’, उनले भने।
साभार… अन्नपूर्ण पोस्ट

Namaste Filmy

Read Previous

पशुपतिले मलाई जापान पनि यही गाउदा चितोनी युवा परे मख्ख

Read Next

बिराज भट्टलाई फाल्गुन ९ बाट हलहलमा हेर्न पाइने । 'सम्राट' रिलिज हुदै ।